Blog

Sapne kaise pura kare(How to Achieve Your Dream)–

Mera “Sapne kaise pura kare” lekh se shuru karne ke pichhe ek reason hai jo is topic se bahut hi mel khati hai, wo apko isi lekh me pata chal jayega.

• Iskeliye maine bahut research ki. Sabse achhi success based 14 kitabe aur 8 blogs ko parha. Kuchh bade aur Successful logo ke interviews ko dekha.

kamyabi ka Psychology, Tathya, kahani aur sabka saar/nichod mai yaha 6 point me batane jaraha hun. Jisse tumhe utni mehnat na karni padi, tumhara time bhi save ho. and Dreams kaise pura kare, iska jawab bhi tumhe mil jaye.

But now, mai bas point pe aata hun. Ham apne sapne kaise pura kare. chahe, wo sapne kitni hi badi kyun na ho.

1) Socho! Mujhe karna kya hai?

“Koi bhi insaan jabtak ye puri tarah se na jaan le ki wo chahta kya hai, wo kamyabi nahi paa sakta.”

— NAPOLEON HILL

“Mai kya karu” or “mujhme kya talent hai”. Dost, Iska jawaab har kisi ko khud hi talaash karna chahiye. Ab tum Kahoge, kaise? then, mai batata hun, apne goal ko kaise set kare and fir lakshya kaise praapt kare.

Ek Paper aur pen uthao. uske bad tum jo bhi chahte ho us goal ko paper pe likh daalo, kyuki likhne se hamare dimag ko signal jata hai ki ye bahut kaam ki chiz hai.

Further, ye research ki hui hacks hai. likhne ke bad baar-baar use dekho, isse chize subconscious mind me chhap jati hai. aur fir apne sapne kaise pura kare iska jawab ye khud dega.

But likhna wahi, jo aap sach me chahte ho. Kya aap Doctor or Director banna chahte ho? Engineer or Entrepreneur? Sportsman or Businessman banna chahte ho? Aakhir aap chahte kya ho?

Ye baat apne aapse akele me puchho ki actually me tumhara talent hai kis chiz me? Paise kamane ke chakkar me tum galat goal na apna lena, ki usme jyada paisa hai, chalo wahi karte hain.

Kahin aisa to nahi hai ke tumhara IIT, NEET, UPSC karne ka man kisi dost ya rishtedar ke kahne or karne pe ho raha hai.

Apne andar khojo, tujhme aisi kya baat hai? iske liye apne Intuition(sahaj-bodh) se help lo, jiske bare me Steve jobs ne apne Stanford University me diye gaye speech me kaha tha:-

“Apne dil aur intuition ko follow Karne ki himmat rakhiye. Kahi na kahi wo pahle se hi jante hain ki aap sach me banna kya chahte hain. Baaki sab baad ki cheez hai.” — STEVE JOBS

Kuchh aisa dhundh parahe ho jo agle din ka excitement(bekarari) double karde, Jo yeh Sochne pe majboor kar de ki saala din itna chhota kyun hota hai. Socho aur likho.

2) Plan karke kaam shuru karo

Lakshya haasil karne ke liye, next point hai, Plan banao. Infact, exact plan banao. For example, mujhe 50000₹ September 25th tak earn karna hai or mujhe 6th Feb ko Germany jana hai.

Or mujhe Cricketer banna hai. Us club me next week 5th October se sikhne shuru karunga. Din me 3 ghante ki training ke bad khud 5 ghante practice karunga e.t.c.

Apko sure plan banana hai kya,kab and kaise ka. Us likhe hue ko har din padhe. Afterward, Pahla kadam jald hi lo, kyuki first step sabse mushkil hota hai.

Mujhe bhi is blog ko create karne me and is First article ko likhne me time lag raha tha. Finally, kar hi liya.

Mera ek friend hai, wo around 2018 me kah raha tha ki mai apne Job se bore ho gaya hun. man nahi lagta hai. Mujhe travel vlogger banna hai.

So, mene kaha ban jao, Job chhor do. Then, usne kaha haan yaar mai bhi yahi soch raha hun, weekend pe resign kardunga.

In short, 2-3 time aisa pal aya jisme usne kaha kal chhor dunga ya agle week me job quit kardunga. But Lagbhag 2 saal ho gaye aajtak wo din aya hi nahi.

3) Junoon jaroori hai

Lakshya apko sahi disha deta hai lekin junoon apko us disha me aage badhata hai. –

– TRAVIS MCASHAN

Next, jo kaam tumne chuna hai us kaam ko lekar tumhare andar ek aag honi chahiye, Junoon hona chahiye, ki, “saala is kaam ke bagair mai rah nahi sakta”.

Josh aisa hona chahiye ki apko subah uthne ke liye alarm clock ki zarurat hi na pade. “Think and grow rich” me isi Junoon ko “burning desire” naam diya gaya hai.

• Kya tumhe kisine kaha ke tum nahi kar sakte?
• School ya College me kisine bully kiya hai?
• Kya tumhe kisine reject kiya hai ya dhokha diya hai?
• Kya tumhe kisine kam ya bekaar samjha?

Badle ki aag, aansoo and rejection ko Energy me badal do. ye tumhare andar ek naya josh paida karega. Motivation andar se khud ayegi.

Then, ye tumse wo sab kaam karwayega, By which, tere sapne pure honge.

2007 me Michael Phelps ne announce kiya, ki mai next saal Olympic me 8 gold medal jitunga.

After that, sabne uspar tanz kasa aur hanse, media ne bhi bahut mazak udaya. Lekin Phelps ne sabki baato aur mazak ko hi apna motivation banaya.

Firstly, 12-12 ghante practice karna start kardiya. Lekin isi dauran achanak unka haath fracture hogaya.

Doctor ne kaha ki wo is Olympic me hissa nahi le payenge. But, junoon 8 gold medal ka aisa, ki roke na ruke.

Secondly, unhone 1 saal tak pair se swim karna sikha, and khud ko itna behtar banaya ki Olympic ke itihaas me 8 gold medal jeetne ka World record bana diya.

4) Khud pe vishwas karo

Once, Australian spinner Brad Hogg ne Sachin Tendulkar ko bold kar diya. wo wicket lene ke bad bahut khush hua ki “mene sachin ko out kiya hai, wo bhi bold”.

In short, Match khatm hone ke bad wo usi ball ko Sachin ke pas lekar aya aur bade khushi se kaha, “aaj maine aapka wicket liya hai wo bhi bold, mujhe is ball pe aap apna autograph dijiye”.

However, muskurate hue Sachin ne autograph sign kiya and ek line likhi :-

“Aaj ke baad tum kabhi mera wicket nahi le paaoge”

Unko khud pe kitna vishwas hoga, ki us line ko proof karne ke irade ko man me bithakar surely ball pe likh dala.

Even though, Sachin aur Hogg ne 35 matches me ek dusre ko face kiya. But, wo kabhi sachin ka wicket nahi le paye.

Ye hota hai self confidence. Saala khud pe vishwas aise karo ke chahe kuchh bhi ho, jo tum thaanlo wo kardo.

Vishwas tumhe mushkilo se ladne ki taaqat deta hai. Jab tum khud ko best mante ho, then brain bhi wahi maan leta hai.

Therefore, tumhe naye-naye ideas aana aur mauke milna shuru ho jata hai.

Dusre log tujhme kitna vishwaas rakhte hai isse ghanta fark nahi parta.lekin tum khud pe kitna vishwaas rakhte ho isse har ghanta fark parta hai.

Apne aap par vishwas rakhe, aur aap chamatkar karenge.

KAILASH SATYARTHI, Noble Peace Prize Winner 2014

5) Apne hunar ko seekhte raho

Ab tumne jo bhi khwaab dekha hai, ab uske bare me Janna aur seekhna behad jaruri hai.

Whether wo kisi institute, coaching ya club me admission lekar sikhna pare, or uske liye koi books ya lekh parhna pare. 

Aajkal to koi bhi jankari ya information bas ungli ke tip pe maujood hai. Chahe aap kahi bhi ho.

To clarify, Internet, Google, YouTube e.t.c se aap kya nahi sikh sakte. Sambhavnayen anant hai. Bas ek search karne ki zarurat hai.

Therefore, bina seekhe ya parhe kisi bhi sapne ko pura karna aisa ho jata hai jaise bina driver/guide ke train chal rahi ho.

Tension na lo, ye parhna aur seekhna, school ya College ki padhai aur book se alag aur aasan hoti hai.

Infact, Is process se tumhari asli taiyari hoti hai. Meanwhile,tum apne lakshya ke bare me achhe se samajh aur jaan paate ho.

Kahan, kab, kis chiz ko kaise use karna hai, kya karna hai aur kya nahi karna hai e.t.c. ham samajh aur jaan pate hain.

“Jisne bhi seekhna chhor diya wo budha hai, chahe 20 saal ki age me ho ya 80 saal.”

HENRY FORD,

6) Haarna hi nahi hai

Hamari sabse badi kamzori haar maan lena hai.Safal hone ka sabse pakka tarika hai, ek aur baar koshish karna.

THOMAS ALVA EDISON

Ek pal ham sabhi ki zindagi me aisa aata hai, jab hame lagta hai ki, yaar kuchh sahi nahi ho raha or lage rahne se fayda nahi hai or kismat me hi nahi hai e.t.c.

However, Kamzor ham sab ho jaate hai, ham dar jate hain, toot jate hain, khud pe shak karne lag jate hain. Hame lagta hai ki ab hamara kuchh nahi ho sakta.

Lekin jab kabhi tum haar manne wale ho to bas apne aapse kahna “chal ek bar aur try karte hain na”. For example:-

Nawazuddin Siddiqui ko jab movie me kuch khaas kaam nahi mil raha tha ya kabhi milta bhi to 10-20 sec ka role.

In short, unhe aise hi try karte hue 12 saal ho gaye. Then, usne yahi socha ke chhor dete hain.

Afterward, Unhone maa ko 1 letter likha, kuch din baad maa ki taraf se reply aaya.

“beta 12 saal me to koore-karkat ke bhi din badal jate hain, tu to khair insaan hai” .

Certainly, Isse nawaz ko himmat mili aur 1-2 saal lagatar mehnat ke bad unhe aisi kamyabi mili jinhe mai, tum, sab jante hain.

Now,ek aur bahut famous person ki story bhi dekho, Jise duniya me shayad hi koi na janta ho, Naam hai unka ABRAHAM LINCOLN.

1809 At first, 12 February ko gareeb pariwar me paida hue

1816 unke pariwar ko kiraye ke ghar se nikal diya gaya and then, unhe khud ghar chalane ke liye kaam karna pada.

1818 9 saal ki age, unki mother guzar gayi

1828 uski ek sister expire ho gayi

1831 ek business me fail ho gaye

1832 state legislature ke liye khade hue–haar gaye aur isi saal Job bhi unki chali gayi. Then, law school jana chahte the but admission nahi ho payi.

1833 Once, apne ek dost se business ke liye paise karz liye and saal ke akhir tak wo diwaliya ho gaye. Aur us karz ko chukane me unhe 17 saal lage.

1834 Again, state legislature me khade hue– Jeet gaye

1835 Unki mangetar jinse recently shaadi hone wali thi, wo bhi expire ho gayi. Hence, puri tarah toot gaye.

1836 Nervous breakdown hua aur 6 mahine bed pe rahe.

1838 State legislature ke speaker banna chaha — haar gaye

1840 Nirvachak(Elector) banne ki koshish ki– nahi ban paye

1843 Then, Congress ke liye lade– haar gaye

1846 Again, congress ke liye khade hue– is bar jeete aur Washington gaye waha achha kaam kiya.

1848 Congress ke liye re-election me lade– isme bhi haare

1849 apne home state me land officer ka job karna chaha– reject kiye gaye

1854 USA senate(rajyasabha) ke liye khade hue– isme bhi haar gaye

1856 Apne national party ke sammelan me Vice- president ke pad ke dawedar bane– 100 se bhi kam vote mile

1859 Firse USA senate ke liye lade– again haare

1860 Finally, wo America ka President banne me kamyab ho gaye.

“Kuch karne ki ichha rakhne wale vyakti ke liye is duniya me kuchh bhi asambhav nahi hai.”

ABRAHAM LINCOLN

In conclusion, dekhlo dosto, bina haare, bina ruke, chalte rahne ka result kya hota hai. Apne sapne ko kaise pura kare koi inse sikhe.

Most importantly, Patience rakho aur kaam karte raho. Jaise har andheri raat ke baad ek Sunahri subah hoti hai na waise hi tera bhi sunahra waqt ayega.

Dosto aplogo ko ye article kaisa laga Comment karke zarur bataye. Koi raay, koi kami ya koi Feedback jo aap dena chahte hai, aap bina jhijhak de sakte ho.